En damé en kik ondervoenden daze eerst moeten veranderingen anbriengen in ’t Hospitaal om te kunnen begunnen an ’t Moederhuis.
Ze gaon e gank ennè. Wie? wat? Wuk?
Ewè, eje ginder gin ogen in junder kop? De werken aan d’holle nateurlik. Niettegenstaande koede en wiend tummeren ze maor drup los, juyste lik da nunder leven der van of hing.
Hèd ’t lange e deurt eer dan ze dran begunnen en, ze doender nu toch an vors ennè, ken klappen toen nog nie van ’t Nieuwerck, wo dan z’ook de peze drup leggen. En zeggen dat dat olgelik ’t werk is van en député van de schevenpé (pardon C.V.P.), ten tiede datten minister was, je wit wel den dien van Roeselare, die vo sommigste Ieperlingen nie van passe e koste kieken. Mo nu zeggen ze niet mi.
Mo witje waor danze ook e gank gaon? in ’t Moederhuis. Ken mien de moeite getroost om dat daor van up mien uitkiekpost in d’oge t’hoeden. Den helt van den tied is dat daor overbevolkt en zien ze verplicht van de menschen naor ’t hospitaal over te briengen, omdatter in ’t Moederhuis gin platse e noeg is.
En zeggen dat de plans vo te vergroten ol meir dan e jaor in e farde liggen. Je wit os kik mien neuze e twa in steken ….
En damé en kik ondervoenden daze eerst moeten veranderingen anbriengen in ’t Hospitaal om te kunnen begunnen an ’t Moederhuis. Want ’t Moederhuis moe kunnen overebrocht zien naer ’t Hospital omda ze daor toen zoen kunnen vors doen. Mo wanneer dat dat ga gebeuren?
’t Zoe kunnen in ’t Jèsetjes tied zien. Maor os ze begunnen an entwatte t’Ieper; ze gaon e gank wei. ’t Is mo d’afferre van dran te begunnen zieje.
De Drake in ‘Brief van de Drake’.
–
Uit ‘Het Wekelijks Nieuws’ van 1 maart 1952 – www.historischekranten.be
