Vlaamsche Bergen

Ik zien Cassel op ’n berg van ’n venster van men huus
T’ is lyk een kleen eiland in ’t middel van de zee
De groote groene zee zo schoone in ’t maand van mei
Zo goed om te rieken, komt toet Cassel mee nuus!

Edoken van een hout onmeugelyk bezoek
Daar djuuste by Cassel is een andere berg
Maar een kleen lytje vadder me klimmen toet ’n Katsberg
En kopen paterskaas, gy komt dervan zo kloek.

Toen over de schreve de rode en zwarte bergen
En ’n Kemmelberg vul bloemen in ’n uutkom van ’n winter

Is lyk een kleen kindje bachten vader en moeder
Hier en daar me kun staan en zitten in d’ herbergen.

‘k Hèn een paare vrienden die dat kun doen te voete
Gaan lyk dykedelvers ze zyn een bitje zot
Maar menschen lyk wyder bluuven in nulder ‘kot’
Dromen van ’n ouden tyd zyder goung toen te voete!

–

Jean-Noël Ternynck (Steenvoorde)
Uit ‘Van de Leie toet de Zee’

– Kleene Vlaamsche en Fransche gedichten uit Frans-Vlaanderen –