Menheere van ’t Ypertje,
‘k Was met de kermisse en keer naar Zoetenaaie gegaan om Sissen goendag te zeggen. Dien braven man begunt van langst om meer te sukkelen. ’t Komtn en oud ventje. Euxodie is ol ten vullen aan ’t suffen. Ze vertelt ossan van ’t zelfste, van den tijd dat ze in hulderen metro weunden aan ’t Hoorewerk, van die waarzeggege die zooveel de planate sloeg, aksetera, aksetera.
Of te wel dat hen in de gazetten nie meer en schrijft is Sissen nog ossan liefhebber van babbelen. ’t Is de grootste kommeere van de prochie en de waare gazette van zen gebeurte. Os je en eure bij hem gezeten hèt, weet je ol ’t nieuws van de streke. En ’t er is ossan veel nieuws in Zoetenaaie.
Z’hèn groote kosten gedaan om en filter te zetten gunter bij de Kromme beuke voor ’t water van den Blankaart te zuiveren. En om dan de menschen wel zoun kunnen ’t verschil proeven, geven ze overans, eerst van dat kristaalwater en toen en boelion van puiderek met een klein vischreuksche, direkt vanuit ’t Beverdijksche.
Ook is er niemand meer die twijfelt of dat dien filter werkt up en draad, ieder keer dan z’hem wel willen gebruiken. En om aan ol de liefhebbers voldoeninge te geven, mingelen ze toen van tijd tot tijd de twee teusches. Die dagen is olleszins ’t zopzen tcheventig centiemen den kubieke meter weerd!
De properteiten zijn volgens dat ’t schijnt nogol stief aan ’t diezen in Zoetenaaie. ’t En is ook niet te verwonderen. De gemeente raad houdt nog ossan zulke kluchtige zittingen dat er ieder keer dat hen zetelt en grooten toeloop van volk is, en dat ol de hotels van aan de transstatie tot aan de Bascule hoedjevul zitten.
De artiesten die er sedert de laatste stemminge nog bijgekomen zijn, zijn waarachtige charels! Dit alles bringt veel profijt voor de neringdoeners en de reputacie er van is ol tot in het verre Gheel geraakt. Men vertelt dat er, in eene van de laatste venditien, een huis tot aan en schoonen stuiver zou gesteken geweest hèn deur en dokteur van gunter. Je weet dat z’er in Gheel een handje van hebben voor zekere ziekten te genezen en dien mensch moet zeker gepeist hèn dat, of mosten maar de raadsheeren olleen zen kalanten zijn, hij ol werk genoeg zoudt hèn, omdat zen broodje zou gebakken zijn. ’t Zoudt olleszins ol en schoon kerweitje zijn.
Ze zijn van langst om meer en meer sportief in Zoetenaaie. Z’hèn zelve en paar nieuwe sporten uitgepeist die zekers wel veel suksès gaan vinden overol waar dan ze ze gaan probeeren.
Onder ander zijn ze sterk in ’t sport van ’t rapste meugelijk de vendels aan de fassade van ’t gemeentehuis uit te steken, in te trekken en toen weer uit te steken. Je kunt nie belooven hoe rap dat ’t ol gaat!
En toen, hèn z’en sport uitgevonden die bestaat uit het bijeenroepen van vergaringen van den gemeenteraad, waar dan de raadsheren katjeduik meugen spelen. Den eene keer zijn ’t d’eene die n’hulder meugen wegsteken en den anderen keer zijn ’t d’andere. De menschen die dat spelletje niet en kennen peizen dan de die, die n’hulder hèn meugen wegsteken, simpelijk kootje steken, maar ze zijn mis. In olle spelen hè je azoo menschen die staan te kijken en die ’t spel niet verstaan, zelve os ’t maar kutten, of knikkeren, of hinkelen, of mieffelen en is.
Je ziet, meneere van ’t Ypertjen dat de menschen gunter wel weten weuk te doen om aangenaam den tijd te slijten. ‘k En zeggen nie dat dit nie en beetje kostelijk en volt in de kasse en dat de zakken van de gemeente damee ossan rap aveceeren, maar os je etwat wilt hèn van de moeite weerd, moe-je ook kunnen verstaan da je ’t nie en kunt krijgen zonder den prijs te besteen.
’t Er zijn pertank nog prochianen die dat nie en willen verstaan en die zelfs zo verre gaan van te zeggen dat ’t in den ouden tijd beter ging en dat de oude moden treffelijker waren. J’hèt azoo ossan van die pezewevers en van die rikzagers die nooit met niet kontent en zijn!
En nu, meneere van ’t Ypertje, salu en tot den naasten keer.
Fluppen van ’t Paddegat.
–
Uit Het Ypersche van 1 oktober 1927 – www.historischekranten.be –
